ಲಾಕ್‌ಡೌನ್ 4.0: ಕೇಂದ್ರ ಸರ್ಕಾರ ನೀಡಿರುವ ಸಡಿಲಿಕೆಗಳೇನು?
ರಾಷ್ಟ್ರೀಯ

ಲಾಕ್‌ಡೌನ್ 4.0: ಕೇಂದ್ರ ಸರ್ಕಾರ ನೀಡಿರುವ ಸಡಿಲಿಕೆಗಳೇನು?

ದೇಶದೆಲ್ಲೆಡೆ ಅನ್ವಯವಾಗುವಂತೆ ಕೆಲ ನಿಯಮಾವಳಿ ಕೇಂದ್ರ ಸರ್ಕಾರ ರೂಪಿಸಿದೆ. ಹೊಸ ನಿಯಮಾವಳಿ ಪ್ರಕಾರ ರೈಲು, ವಿಮಾನ ಸಂಚಾರಕ್ಕೆ ಅವಕಾಶ ಇಲ್ಲ. ಆದ್ರೆ, ವೈದ್ಯಕೀಯ ಉದ್ದೇಶಕ್ಕೆ ವಿಮಾನ ಸಂಚಾರಕ್ಕೆ ಅವಕಾಶ ಕಲ್ಪಿಸಲಾಗಿದೆ.

ಕೃಷ್ಣಮಣಿ

ದೇಶಾದ್ಯಂತ ಮತ್ತೆ 4ನೇ ಹಂತದ ಲಾಕ್‌ಡೌನ್‌ ಮುಂದುವರಿಸಿ ಕೇಂದ್ರ ಗೃಹ ಇಲಾಖೆ ಆದೇಶ ಮಾಡಿದೆ. ಸೋಮವಾರದಿಂದಲೇ ದೇಶದೆಲ್ಲೆಡೆ 4ನೇ ಹಂತದ ಲಾಕ್‌ಡೌನ್‌ ಆರಂಭವಾಗಲಿದೆ. ಮೇ 31ರವರೆಗೆ ಜಾರಿಯಲ್ಲಿರುವ ಈ ಲಾಕ್‌ಡೌನ್‌ನಲ್ಲಿ ಕೆಲವು ನಿಯಮಗಳನ್ನ ಬದಲಾವಣೆ ಮಾಡಲಾಗಿದೆ. ಇನ್ನೂ ಕೆಲವು ನಿಯಮಗಳನ್ನ ರಾಜ್ಯ ಸರ್ಕಾರಗಳ ವಿವೇಚನೆಗೆ ಬಿಡಲಾಗಿದೆ. ಕೇಂದ್ರ ಗೃಹ ಇಲಾಖೆ ಹೊರಡಿಸರುವ ಮಾರ್ಗಸೂಚಿ ಪ್ರಕಾರ 12 ರಾಜ್ಯಗಳ 30 ಪಾಲಿಕೆಗಳ ವ್ಯಾಪ್ತಿಯಲ್ಲಿ ಶೇಕಡ 80ರಷ್ಟು ಕರೋನಾ ಪಾಸಿಟಿವ್ ಕೇಸ್ಗಳಿದ್ದು, ಈ 30 ಪಾಲಿಕೆಗಳ ವ್ಯಾಪ್ತಿಯಲ್ಲಿ ಯಾವುದೇ ನಿಯಮ ಸಡಿಲಿಕೆ ಇಲ್ಲ. ಈ 30 ಪಾಲಿಕೆಗಳ ಪಟ್ಟಿಯಲ್ಲಿ ಕರ್ನಾಟಕದ ಯಾವ ಜಿಲ್ಲೆಯೂ ಸೇರಿಲ್ಲ. ಪ್ರಧಾನಿ ನರೇಂದ್ರ ಮೋದಿ ಈ ಮೊದಲೇ ಘೋಷಿಸಿದಂತೆ ಈ ಬಾರಿಯ ಲಾಕ್‌ಡೌನ್‌ ಹೊಸ ನಿಯಮಗಳಿಂದ ಕೂಡಿದೆ.

ದೇಶದೆಲ್ಲೆಡೆ ಅನ್ವಯವಾಗುವಂತೆ ಕೆಲ ನಿಯಮಾವಳಿ ಕೇಂದ್ರ ಸರ್ಕಾರ ರೂಪಿಸಿದೆ. ಹೊಸ ನಿಯಮಾವಳಿ ಪ್ರಕಾರ ರೈಲು, ವಿಮಾನ ಸಂಚಾರಕ್ಕೆ ಅವಕಾಶ ಇಲ್ಲ. ಆದ್ರೆ, ವೈದ್ಯಕೀಯ ಉದ್ದೇಶಕ್ಕೆ ವಿಮಾನ ಸಂಚಾರಕ್ಕೆ ಅವಕಾಶ ಕಲ್ಪಿಸಲಾಗಿದೆ. ಮೆಟ್ರೋ ರೈಲು ಸಂಚಾರ ಇರಲ್ಲ, ಶಾಲೆ, ಕಾಲೇಜು, ವಿದ್ಯಾಸಂಸ್ಥೆಗಳು ತೆರೆಯುವಂತಿಲ್ಲ. ಆದ್ರೆ ಆನ್ಲೈನ್ ಶಿಕ್ಷಣಕ್ಕೆ ಅವಕಾಶ ಮುಂದುವರಿದಿದೆ. ಹೋಟೆಲ್ಗಳಲ್ಲಿ ಪಾರ್ಸಲ್ಗಷ್ಟೇ ಅವಕಾಶವಿದೆ. ಚಿತ್ರಮಂದಿರ, ಶಾಪಿಂಗ್ ಮಾಲ್ ತೆರೆಯುವಂತಿಲ್ಲ. ಜಿಮ್, ಸ್ವಿಮ್ಮಿಂಗ್ ಪೂಲ್, ಥಿಯೇಟರ್ ಓಪನ್ ಮಾಡುವಂತಿಲ್ಲ. ಬಾರ್, ಆಡಿಟೋರಿಯಂ ಕೂಡ ಮುಚ್ಚಿರಲಿದೆ. ಕ್ರೀಡಾಂಗಣಗಳಲ್ಲಿ ಕ್ರೀಡಾ ಚಟುವಟಿಕೆಗಳಿಗೆ ಅವಕಾಶ ಕಲ್ಪಿಸಲಾಗಿದೆ. ಆದರೆ ವೀಕ್ಷಕರ ಪ್ರವೇಶಕ್ಕೆ ಅವಕಾಶ ಇಲ್ಲ. ರಾಜಕೀಯ, ಧಾರ್ಮಿಕ ಸೇರಿದಂತೆ ಯಾವುದೇ ರೀತಿಯ ಸಭೆ, ಸಮಾರಂಭಗಳು ನಡೆಸುವಂತಿಲ್ಲ. ಧಾರ್ಮಿಕ ಕೇಂದ್ರಗಳಲ್ಲಿ ಸಾರ್ವಜನಿಕರ ದರ್ಶನಕ್ಕೂ ಅವಕಾಶ ಇರಲ್ಲ.

ಅಂತರ್ ರಾಜ್ಯ ಬಸ್ ಸಂಚಾರಕ್ಕೆ ಅವಕಾಶ ಇದೆ, ಆದ್ರೆ, ಬಸ್ ಸಂಚಾರ ಮಾಡುವ ಎರಡು ರಾಜ್ಯಗಳ ಒಪ್ಪಿಗೆ ಇರಬೇಕು. ರಾಜ್ಯದೊಳಗೆ ಬಸ್ ಸಂಚಾರಕ್ಕೂ ಅವಕಾಶ ಇದ್ದು, ಬಸ್ ಓಡಿಸಬೇಕಾ ಬೇಡವೇ ಎನ್ನುವುದನ್ನು ಆಯಾ ರಾಜ್ಯಗಳೇ ನಿರ್ಧರಿಸಬೇಕು. ಕಾರ್ಮಿಕರು, ವಲಸಿಗರ ಸಂಚಾರ ಈಗಿನಂತೆಯೇ ಅವರವರ ಊರುಗಳಿಗೆ ಕಳುಹಿಸಲು ಅವಕಾಶ ಮುಂದುವರಿಸಲಾಗಿದೆ. ಈಗಿರುವ ಎಲ್ಲಾ ಕರೋನಾ ನಿಯಮ ಪಾಲನೆ ಮಾಡಲೇಬೇಕು. ಸಾಮಾಜಿಕ ಅಂತರ ಕಡ್ಡಾಯ, ಮುಖಗವಸು ಧರಿಸಲೇಬೇಕು, ಕಚೇರಿಗಳಲ್ಲಿ ಸ್ಯಾನಿಟೈಸರ್ ಬಳಕೆ ಕಡ್ಡಾಯ. ಬೆಳಗ್ಗೆ 7ರಿಂದ ಸಂಜೆ 7ರವರೆಗೆ ಸಂಚಾರಕ್ಕೆ ಅವಕಾಶವಿದೆ. ಸಂಜೆ 7ರಿಂದ ಬೆಳಗ್ಗೆ 7ರವರೆಗೆ ಕರ್ಫ್ಯೂ ಜಾರಿಯಲ್ಲಿ ಇರಲಿದೆ. ಮದುವೆ ಕಾರ್ಯಕ್ರಮಕ್ಕೆ 50 ಜನರಿಗೆ ಮಾತ್ರ ಅವಕಾಶವಿದೆ. ಅಂತ್ಯಕ್ರಿಯೆಯಲ್ಲಿ 20 ಜನರಿಗಷ್ಟೇ ಭಾಗಿಯಾಗಲು ಅವಕಾಶ ಇದೆ.

ಇನ್ನು ಕೆಂಪು, ಕಿತ್ತಳೆ, ಹಸಿರು ವಲಯಗಳನ್ನ ಆಯಾ ರಾಜ್ಯಗಳೇ ನಿರ್ಧರಿಸಬೇಕು. ಈ ಝೋನ್ಗಳಲ್ಲಿ ಕಂಟೇನ್ಮೆಂಟ್ ವಲಯ, ಬಫರ್ ಝೋನ್ಗಳನ್ನ ಜಿಲ್ಲಾಡಳಿತಗಳು ನಿರ್ಧರಿಸಬೇಕು. ಕಂಟೇನ್ಮೆಂಟ್ ಝೋನ್ಗಳಲ್ಲಿ ಈಗಿನಂತೆಯೇ ನಿರ್ಬಂಧ ಮುಂದುವರಿಯಲಿದೆ. ಅಗತ್ಯ ವಸ್ತುಗಳ ಸರಭರಾಜಿಗೆ ಅವಕಾಶ ಕಲ್ಪಿಸಲಾಗಿದೆ. ಕಂಟೇನ್ಮೆಂಟ್ ಝೋನ್ಗಳಿಂದ ಜನ ಹೊರಗಡೆ ಬರುವಂತಿಲ್ಲ, ಹೊರಗಿನಿಂದ ಕಂಟೇನ್ಮೆಂಟ್ ಝೋನ್ಗಳಿಗೆ ಜನ ಹೋಗುವಂತಿಲ್ಲ. ಆದ್ರೆ, ವೈದ್ಯಕೀಯ ಉದ್ದೇಶಕ್ಕೆ ಸಂಚರಿಸಬಹುದು ಹಾಗೂ ಅಗತ್ಯ ವಸ್ತು ಪೂರೈಕೆಗೆ ಅವಕಾಶ ಕಲ್ಪಿಸಲಾಗಿದೆ.

65 ವರ್ಷ ಮೀರಿದವರು, 10 ವರ್ಷದೊಳಗಿನ ಮಕ್ಕಳು, ಗರ್ಭಿಣಿಯರು, ಅಗತ್ಯವಿದ್ದರೆ ಮಾತ್ರ ಹೊರಗಡೆ ಬರಬೇಕು. ಎಲ್ಲರೂ ಆರೋಗ್ಯ ಸೇತು ಌಪ್ ಬಳಸಬೇಕು ಎಂದು ಕೇಂದ್ರ ಸರ್ಕಾರ ಸೂಚನೆ ನೀಡಿದೆ. ಇನ್ನು, ವೈದ್ಯಕೀಯ ಸಿಬ್ಬಂದಿ, ಆಂಬ್ಯುಲೆನ್ಸ್ ಸಂಚಾರಕ್ಕೆ ಯಾವುದೇ ನಿರ್ಬಂಧ ಇಲ್ಲದೇ ರಾಜ್ಯದೊಳಗೆ ಹಾಗೂ ಅಂತರ್ ರಾಜ್ಯದಲ್ಲೂ ಸಂಚರಿಸಲು ಅವಕಾಶ ಕಲ್ಪಿಸಲಾಗಿದೆ. ಇದೇ ವೇಳೆ, ಸರಕು ಸಾಗಣೆ ವಾಹನಗಳೂ ಅಂತರ್ ರಾಜ್ಯದಲ್ಲಿ ಸಂಚರಿಸಲು ಅವಕಾಶ ಕಲ್ಪಿಸಲಾಗಿದೆ. ಇನ್ನು ಮದ್ಯ ಮಾರಾಟಕ್ಕೆ ಈಗಿನಂತೆಯೇ ಅವಕಾಶ ಇದ್ದು, ಸಾರ್ವಜನಿಕ ಸ್ಥಳಗಳಲ್ಲಿ ಮದ್ಯಪಾನ, ತಂಬಾಕು ಸೇವನೆ ನಿಷೇಧ ಮುಂದುವರಿದಿದೆ. ಈಗಿನಂತೆಯೇ ಅಂಗಡಿಗಳು ತೆರದಿರಲಿದ್ದು, ಸಾಮಾಜಿಕ ಅಂತರ ಪಾಲಿಸಬೇಕಿದೆ. ಅಂತಿಮವಾಗಿ ಆದಷ್ಟೂ ವರ್ಕ್ ಫ್ರಂ ಹೋಂಗೆ ಅವಕಾಶ ಕಲ್ಪಿಸುವಂತೆ ಕೇಂದ್ರ ಸರ್ಕಾರ ಸೂಚನೆ ನೀಡಿದೆ.

Click here Support Free Press and Independent Journalism

Pratidhvani
www.pratidhvani.com